انا عمري ٢٠ سنة، آغلب العشرين سنة دي تعبت فيها وانا اتنقل من رجيم لتاني وكل شوية الاقي سبب اني اوقف وابدأ من جديد ... وطبعا لما اجي ابدأ أقول خليها بعد الاختبارات ... بعد الاختبارات اقول احد يعمل رجيم باجازة ... وبعد الاجازة اقول لسه ما اتعودت على الدوام ... وخدلك من كدة كتير. وبعدين اخيرا بدأ رجيم من يوم السبت ويعدي السبت والاحد ويجي الاتنين واخبص في الرجيم فأقول أوقف وابدأ يوم السبت من جديد. قضيت اغلب فترة حياتي وانا ماشية على الـ "يويو دايت / yoyo diet" وطبعا كل ما اعمل رجيم انحف كم كيلو واول ما اوقف ارجعهم ولو مو حتى اكتر منهم.
تقريبا جريت كل انواع الرجيمات الموجودة، جربت الرجيم الكيميائي ،رجيم قطع الكربوهيدرات، ورجيم ال ١٧ يوم. جربت وشربت اشياء غريبة معمولة سواء من القرفة ولا من الكمون ودي الاشياء. حتى اني للأسف جربت أدوية تخسيس.
اخيرا بعد كل اللي مريت فيه اكتشفت اني كنت ماشية غلط، فكرة اني اعمل رجيم من الاساس كانت غلط بالنسبة لشخص زيي، المفروض ما اعمل رجيم لكم يوم واوقف، بالعكس المفروض اعمل نظام حياة صحي فيه الأكلات اللي أحبها بس مطبوخة بطريقة أحسن وفي نفس الوقت لازم الرياضة، كمان اكتشفت اني لازم اكون متحفزة لكن في نفس الوقت احط توقعات طبيعية عشان لا يجيني احباط، ما ينفع اتوقع اني انحف ٧ كيلو في اسبوع مثلا. كمان لازم ابدأ من اللحظة اللي قررت فيها ما اقول بكرة ولا السبت ولو خبصت يوم ما اوقف بالعكس احاول اعمل رياضة احرق فيها اللي اكلتو واكمل عادي. فلو كنت بتفكر تبدأ نظام صحي ابدأ من دحين من دي اللحظة لا تقول بكرة ولا السبت.
برأيي كل شي تقرؤو او تسمعو ويبين انو مررة سهل انك تنحف يا انو كداب يا انو مو صحي (زي اللي يقلك خدلك دا الدواء ومن غير رياضة ولا رجيم حتنحف او انو يقولك حتنحف ٢٠ كيلو في شهر). انك تنحف حاجة مهي سهلة لكنها تستاهل كل التعب. لو حسيت انك بدأت تحبط اتخيل قد ايش حتكون مبسوط لما تروح تشتري ملابس وتاخد مقاس اصغر ولا لما تنزل من ١٠٠ ل ٩٠ ولا من ٩٠ ل٨٠ ولا من ٨٠ ل ٧٠ ولا من ٧٠ ل ٦٠.
اخيرا اذا كنت حابب تنحف لا تحاول تفتش على عذر انك تأجل متى تبدأ لانو مليان اعذار لكن ولا واحد منها عذر حقيقي فلو حابب تبدأ ابدأ من دحين
ليست هناك تعليقات:
إرسال تعليق