السبت، 31 مايو، 2014

cambridge diet ... دايت كامبردج

كتير مننا سمع عن رجيمات سريعة وتنزل الوزن بسرعة ومن اهم هادي الرجيمات "كامبردج دايت" طبعا السؤال المهم واللي الكل يبغى يعرفو هو هل دايت كامبرج ينحف ولا لأ؟!

طبعا أنا مداني أعطيكم اجابة قصيرة تختصر بنعم أو لأ لكن الموضوع مهو بي البساطة لاني أنا أقدر اتكلم عن تجربتي وتجربة بعض الأشخاص اللي أعرفهم شخصيا.

قبل أي شي ايش هو نظام كامبردج؟؟؟
طبعا الكل مداه يدخل الموقع الرسمي ويبحث بس أنا حأقولو هنا باختصار. رجيم كامبردج يصنف من الرجيما القليلة السعرات جدا حيث تتراوح سعراته ما بين ٤٥٠ - ١٥٠٠ طبعا حسب الخطوة اللي يحطوك فيها. رجيم كامبرج يهدف انو يضع الجسم في حالة مجاعة او "starvation" مما يدخلك في مرحلة الكيتوزية " فيضطر الجسم يحرق الدهون عشان يوفر طاقة.
رجيم كامبردج يتكون من ٦ خطوات:
١- ٤٥٠ كالوري (كل الوجبات من عندهم بالاضافة الى كوب حليب او لبن قليل الدسم)
٢- ٨٥٠ كالوري ( ٣ وجبات من عندهم بالاضافة الى كوب حليب او لبن قليل الدسم + وجبة من البروتينات)
٣- ١٠٠٠ كالوري ...
٤- ١٢٠٠ كالوري ...
٥- ١٥٠٠ كالوري ...
٦- المحافظة على الوزن ...

نبدأ بتجربتي انا شخصيا:
طبعا انا قبل ما اشترك قابلت شخصين نحفو على كامبردج ما شاء الله بشكل ملحوظ ولما قالولي انهم نحفو على كامبردج انا اتحمست وقلت حأشترك وبالفعل اشتركت. اول ما اشتركت حطوني الخطوة الثانية ومشيت عليها اسبوعين وبصراحة ما قدرت امشي غير اسبوع واحد لانو الوجبات وقتها ما كانت متوفرة فما كان باقي غير نكهات ما عجبتني ابدا وما قدرت اكمل لكن في دي الفترة نحفت ٢ كيلو لعدم التزامي. بعد مرور الأسبوعين اتوفرت الوجبات ورحت وبدلت الوجبات اللي عندي وجبت أشياء طعمها مقبول بالنسبة ليا واتفقنا اني انزل للخطوة الأولى وبالفعل مشيت على الدايت مرره كويس والتزمت ونحفت ٥ كيلو ونص في اسبوعين (كنت احيانا امشي ربع ساعة في اليوم لانو قالولي لا تسوي رياضة غير شوية لو تبغي ) . بعدها التزمت كمان اسبوع  لكن في نهاية الأسبوع أكلت من طبخ ماما وتاني يوم الاقي نفسي تخنت ١،٥ كيلو مع اني ما أكلت كتير والتزمت كم يوم بعدها لكني الأسبوع اللي بعدو وقفتو لاني حسيت اني محرومة من الأكل وعشان أكون صريحة حسيت نفسي بآكل زي المرضى لازم اكل خاص وما أقدر أكل أكل زي الناس وبمجرد ما آكل اتخن.

طبعا بالنسبة ليا ايجابيات النظام:
- وجود الوجبات جاهزة بس تخلطيها بموية فمافي داعي افكر بالطبخ
- ينزل الوزن سريع
- ما يحتاج رياضة كتير
- ما تحس بالجوع كتير مع ان الأكل قليل
- أكلهم مدعم بالفيتامينات والمعادن

سلبيات النظام بالنيبة ليا:
- الأكل الحلو حلاه كتير حبتين والمالح مالح كتير حبتين كمان
- حل سريع مع عدم تغير العادات الصحية
- لو خبصتي بوجبة يخرب الدايت بالكامل
- عدم وجود الأكل المعتاد مما يسبب الملل
- احيانا تدوخ لو انشغلت واتأخرت الوجبة عن ٤ ساعات
- اتلخبطت عندي الهرمونات شوية ( مو شي يقلق لكن برضو صار فيها اختلاف)

اقتراحات:
- لو ياخدو تححليل شامل قبل ما يبدؤو معاك هم صحيح يسألو عن حالتك بس أحس لازم ياخدو تحاليل


تجربة الشخصين اللي نحفو عليه:
عشان أكون حقانية فحأقول انو الناس اللي اعرفهم اللي نحفو عليه ( واحد نحف ٥٠ كيلو - وحدة نحفت ٢٥ كيلو ) ينصحو بيه وليهم ٥ شهور مخلصين وما زاد وزنهم غير شي بسيط جدا، يقولو صعب بالبداية بس تتعود بعدين.

---------------------------------------
------------------------------
-------------------
-------------
-----

انا بالأخير ما أقدر أقول كويس ولا لأ في دكاترة ممكن يقولو دا الكلام لكن بس بالنسبة ليا ما ناسبني وبصراحة ما أفكر اشترك فيه تاني لكن كل جسم مختلف.


بالأخير للي حابب يشترك هادا تقييمي للنكهات اللي عندهم:-
(التقيم عبارة عن مقارنة بالوجبات فاللي أخد درجة عالية معناه انو بالنسبة لوجبات كامبردج يعتبر طعم والعكس)

الشوربة:
- دجاج ومشروم: (٨)
- البهارات الشرقية: (٩) كنت احطلها شوية كمون زيادة
- البطاطس: (٧)
-الطماطم: (١) ما طقت لا الطعم ولا الريحة

الشيك:
- شكولاتة: (٧) طعمو زي خليط الكيك حق الشكولاطة انا كنت أحطلو ملعقة قهو وأشربو حار زي الموكا أو أحطو في الخلاط مع تلج  وأكلو زي الأيس كريم
- كابوتشينو: (٨) مستواه كويس وكنت أشربو حار أو في الخلاط مع التلج وأكلو زي الأيس كريم
- فراولة: (٤)
- فواكه استوائية: (٣)
- توفي وجوز: (٦) لحالو ما عجبني لكن لما احط عليه اسبرسو يصير آحسن
- موز: (٢) طعمو فكرني بالأموكسيل " دوا الكحة الأصفر احنا وصغار كنا ناخدو"
- شكولاتة بالبرتقال: (٥)
... في نكهات أكتر بس ما جربتها

البار:
- شكولاتة: (٨)
- شكولاطة بالفول السوداني: (٧)
- شكولاتة بالنعناع: (٦)
- ليمون باللبن: (٧)


الجمعة، 30 مايو، 2014

تخبيص تخبيص تخبيص .... أعذار أعذار أعذار .... بس رجعت مره تانية

طيب انا اترددت كتير قبل لا اقرر اذا ارجع اكتب تاني ولا لأ والصراحة السبب بسيط ... انا السنة اللي فاتت بدأت هادي المدونة ونحفت معاها ١٠ كيلو وكنت بأستمر. ما ابغى اعطي أعذار لكن السنة اللي فاتت مرت عليا مرررره صعبة - هادا مهو سبب  كويس-  وللأسف خلال دي الفترة زي ما يقولو " I was eating my feelings" وتخنت كل اللي نحفتو وكمان زيادة ٦ كيلو يعني مجمل اللي تخنتو ١٦ كيلو !!! ومن وقتها احبطت وقلت خلاص ما أبغى دايت وما أبغى هم انا دبة وخلاص حأفضل طول حياتي دبة ليش أتعب نفسي من الأساس؟!

طبعا أغلبنا لو مو كلنا مرت علينا فتره احبطنا فيها وفقدنا الأمل اننا ننحف لكن من حوالي شهر رجعت راجعت نفسي واستوعبت "الغباء" اللي كنت فيه وقررت أقيس وزني وأشوف قد ايش تخنت عشان أبدأ دايت (أسلوب حياة) جديد تاني وارجع انحف وطبعا ساعتها شفت الكمية المهولة اللي تخنتها لكني بدأت ودحين بعد شهر نحفت ١٠ كيلو الحمد لله وانا دي المره عندي أصرار أكتر وعزيمة أكتر اني انحف وما في أعذار خلاص.

طبعا الأعذار مرررة كتيرة :
١- ما عندي وقت أعمل رياضة ... زبط أولوياتك لو جسمك وصحتك تهمك زي ما يهمك اانك تتابع آخر حلقة من المسلسل الفلاني حتلاقي الوقت
٢- ورايا مشوار طويل ... كل لحظة تتأخر فيها انت بتطول المشوار أكتر وبترجع للخلف، امشي للأمام وبطل ترجع للخلف
٣- الأكل الصحي في السعودية غالي ... لا تشتري أشياء خاصة وغريبة اعمل الدايت من الأشياء اللي تحبها وحاول تحول بعض الوصفات اللي تحبها لطريقة أكتر صحية
٤- اجازة وابغى اتمشى واروح أفلها ... محد قالك اقعد في البيت اخرج المطاعم واتمشى وفلها وكل شي لكن لما تجي تطلب شوف ايش فيه في الطلب وحاول تزبطو على الدايت حقك او شوف القيم الغذائة الموجودة في الطلب ( أغلب المطاعم العالمية تلاقيها اون لاين)
٥- الأكل الصحي مو طعم ...  كل شي في الحياة تقدر تزبطو وتعملو صحي لو أكلك الصحي مو طعم غير أكلك
٦- الدايت يبغالو طبخ وانا ما فيا حيل ،لا مزاج ... رتب أولوياتك والطبخ ممكن يكون بسيط ومرة وحدة بالأسبوع يتجهز للأسبوع كلو وحاول تلاقي المتعة بدا الشي مثلا لو تحب اغاني اسمع اغاني انت وبتطبخ
٧- لما أجوع اكل اي شي قدامي وما افكر اذا صحي ولا لأ ... جهز سناك ولا "نقنقة" صحية تكون موجودة وقت ما تحتاجها
٨- انا مشكلتي مو في الأكل أنا مشكلتي النقنقة ... جهز نقنقة صحية تكون موجود وقت ما تحتاجها
٩- انا كل ما اعمل دايت انحف وارجع اتخن ايش الفايدة ... طبيعي لو رجعت للعادات الغلط حترجع تتخن غير اشلوب حياتك تدريجيا لدرجة انها تصير عادة عندك وما ترجع تتحن تاني
............. وأعذارغيرها كتير، راجع نفسك وحتلاقيها كلها أعذار ابدأ دحين بخطوة للأمام ولا ترجع للخلف أبدا وافتك انو ما تجوع نفسك واعمل ٣ وجبات أساسية بالاضافة الى (١-٢) سناك - طبعا حسب ايش تاكل - عشان لو جوعت نفسك وتعبت نفسك ما رح تستمر وبعدين ممكن بالتجويع تخرب عمليه الأيض وتصير تتخن بسهولة أكبر

المهم بعد دا الكلام الطويل كلو يلا لا تسوي زيي وقت ما وقفت لو ما بدأت ابدأ دحين ولو وقفت ارجع قبل لا تندم

الخميس، 7 فبراير، 2013

pizza goodness بيتزا

العجينة
المقادير:
* ١ و  ١/٢ كوب دقيق اسمر
* ١/٤ كوب شوفان مهروس في  الخلاط
* ١ ملعقة شاي ملح
* ١/٢ ملعقة شاي سكر بني
* ١ ملعقة طعام زيت زيتون
*  ٣/٤ موب ماء ساخن ( ليس لدرجة الغليان)
* ١/٢ ملعقة طعام خميرة

طريقة التحضير:
١- توضع الخميرة في الماء الساخن وتترك
٢- في خلاط العجينة يتم وضع الدقيق والشوفان والملح والسكر وزيت الزيتون ويشغل الخلاط حتى تخلط المكونات معا
٣- يتم اضافة الماء بالخميرة للخليط ويشغل الخلاط على سرعة متوسطة حتى تخلط جميع المكونات ويبدأ تكون العجينة
٤- تغير سرعة الخلاط إلى سرعة بطيئة وتترك لمدة ١٠ دقائق
٥- بعد ١٠ دقائق من الخلط يتم قسم العجينة إلى جزئين وتوضع في إنائين مختلفين وتغطى وتترك لساعتين في مكان دافئ حتى ترتاح





الخلطة ١: بيتزا تقليدية
المقادير:
* ١ طماطم متوسطة الحجم
* ١ ملعقة شاي معجون طماطم
* ١ ملعقة شاي بودرة البصل
* ١ ملعقة شاي بودرة ثوم
* ١/٢ ملعقة شاي بهارات ايطالية
* ملح (حسب الرغبة)
* فلفل أسود (حسب الرغبة)
* فطر
* ٢ - ٣ شريحة بيكون ديك رومي ( يمكن استبداله بمرتديلا ديك رومي)
* ١ شريحة جبنة برايد قليلة الدسم مخلوطة مع جبنة مزرولا قليلة الدسم (يمكن احيار نوع الجبنة المفضل القليل الدسم)

طريقة التحضير:
١- يتم وضع الطماطم مع معجون الطماطم وبودرة البصل والثوم والملح والفلف اسود والبهارات الايطالية في الخلاط
٢- يتم توزيع الخليط على العجينة
٣- يوضع كل من الفطر والبيكون وترش الجبنة فوقها


بعد تجهيز الخلطة يتم رش بعض من الدقيق الأسمر على الطاولة وتفرد العجينة ويتم وضع الخلطة عليها وتخبز بالفرن (٢٠٠ درجة) لمدة ٢٠ دقيقة




الخلطة ٢: ( أعشاب وجبنة)
المقادير:
* زعتر ( حسب الرغبة) "يفضل طازج وان لم يتوفر يمكن استخدام المجفف)
* ملح وفلفل أسود " حسب الرغبة
* ١/٢ كوب بقدونس
* ١/٢ كوب حبق
* عصير نصف ليمونة كبيرة
* ١ ملعقة طعام زيت زيتون
* ٢ فص ثوم
* ٢ ملعقة شاي جبنة فيتا
* ١ ملعقة طعام جبنة بارميزان خالية الدسم " يمكن استخدام بديل جبنة البارميزام الخالي من الدسم"
* جرجير

طريقة التحضير:
١- يتم فرد العجينة وتدهن ب ١/٤ ملعقة زيت زيتون ويرش الزعتر والملح والفلفل أسود عليها وتدخل الفرن لمدة ٢٠ دقيقة (٢٠٠ درجة)
٢- يتم وضع الحبق والبقدونس والليمون والثوم وزيت زيتون في الخلاط
٣- بعد نضوج العجينة يتم توزيع الخليط عليها
٤- تدهن نصف كمية جبنة الفيتا على الخليط ويخلط البقية مع الجرجير
٥- يوضع الجرجير على البيتزا وترش بجبنة البارميزان





الاثنين، 4 فبراير، 2013

Oatmeal Cookies بسكويت الشوفات

ملاحظة: الوصفة من موقع هيرشي ولكن تم التعديل عليها لتناسب نظام غذائي أكثر صحية

المقادير:
* ٢ ملعقة طعام زيت نباتي بطعم الزبدة (flora)
* ١/٢ كوب سكر بني ( يمكن وضع ١/٣ عند الرغبة بحلا أقل)
* .١ ظرف محلي صناعي خالي من السعرات
* ١ ملعقة شاي مستخرج الفانيلا
* ١ ملعقة شاي بيكنج صودا
* ١/٣ ملعقة شاي ملح
* ٢ بيض
* ٢ بياض بيض
* ١/٢ كوب دقيق أسمر
* ١/٢ملعقة شاي قرفة
* ٣ و ١/٢ كوب شوفان
* ٤ ملاعق من HERSHEY'S Butterscotch Chips أو HERSHEY'S dark chocolate Chips

طريقة التحضير:
١- تخلط المكونات الجافة معا
٢- تخلط المكونات السائلة معا
٣- تخلط كل من المكونات الجافة والسائلة معا
٤- يوضع الخليط على لوح الخبز على شكل كرات ويوضع بالفرن لمدة ١٠ دقائق
يمكن عمل بسكوت كبير ثم يتم تقطيعه
٥- يترك حتى يبرد ثم يقدم

الأحد، 3 فبراير، 2013

half the guilt burger

المقادير:
*١٢٠جرام  مفروم دجاج
* خضروات مشكلة حسب الرغبة " أنا استخدمت بروكلي وزهرة وجزر"
* ١ بصل " يفرم ٣/٤ من البصل ويترك ١/٤ دون فرم"
* ١ فص ثوم
*١ ملعقة صغيرة من worcenterrshire sauce
* ١ ملعقة شاي مسترد
* ١ ملعقة شاي كاتشب " يفضل استخدام النوع الذي يحتوي على نشبة أقل من الصوديوم والسكر"
* ملح "حسب الرغبة"
* فلفل أسود " حسب الرغبة"
* ١/٢ ملعقة شاي كمون
* أقل من ١/٨ ملعقة شاي قرفة
* خبز برجر نخالة " أنا لقيتها من ماركة الجازع"
* خس
* شريحة طماطم
* بخاخ زيت زيتون
اختيارى: شريحة ديك رومي مدخن "بيكون"

طريقة التحضير
١-  يرش من بخاخ زيت الزيتون في القدر وتوضع نصف كمية البصل المفروم ويقلب على النار حتى يكتسب اللون الذهبي
٢- يضاف الخضار ويقلب على النار لمدة دقيقة
٣- يضاف ماء ساخن على الخضار ويضاف البصل الغير مفروم والثوم ويتم اضافة الملح والفلفل الأسود والكمون ورشة قرفة ويترك على النار حتى يستوي الخضار تماما
٤- يفرم الخضار في الخلاط
٥- يتم اضافة  بقية البصل المفروم إلى الدجاج وتوضع البهارات (ملح ، فلفل أسود،الباقي من القرفة ) ويضاف كل من الكاتشب والمسترد
٦- يخلط الخضار مع الدجاج ويضاف ال worcenterrshire sauce
٧- يقسم خليط الدجاج إلى كرات حسب حجم الخبز ويوضع في الفرن لمدة ١٥-٢٠ دقيقة

بعد الانتهاء من تحضير الدجاج يتم عمل البرجر بالطريقة المفضلة لك
مثال: "مسحة كاتشب او مايونيز قليل الدسم ، خس ، طماطم ، شريحة الدجاج ، البيكون"


يمكن تحضير بعض من البطاطس المقلية بالأجهزة التي تستخدم ملعقة زيت واحدة أو أقل لقلي البطاطس


الجمعة، 25 يناير، 2013

المطاعم

غالبا لما الواحد يروح مطعم اول شي يجي في بالو انو ياخد سلطة على أساس انو ما يبغى ياخد سعرات حرارية كتيرة ... لكن احيانا السلطات فيها سعرات اكتر من بعض الاطباق الرئيسية.

امس رحت فرايديز واخدت سلطة اسمها "Chipotle Yucatan Chicken salad " بالطبع انا محسبة نفسي اني بدي الطريقة قللت عدد السعرات اللي ممكن اخدها من مطعم لكن لما رجعت البيت دخلت الانترنت اشوف كم سعرة كانت في السلطة لقيت اني من دي السلطة اخدت اكتر من ٨٠٠ سعرة بينما لو طلبت طلب مثلا زي سالمون مشوي كان اخدت تقريبا ٥٢٠ سعرة. 


العبرة انو الافضل اذا حبيت تروح تاكل في مطعم قبل لا تروح تدخل الانترنت وتشوف قائمة الاكل وتشوف السعرات الموجودة في الطلب (احيانا يحطوها في نفس موقع المطعم او انو تلاقيها موجودة في مواقع تانية) 

طبعا المواقع اللي ممكن تساعدك كتيرة لكن عن نفسي موقعي المفضل هو
http://www.calorieking.com/foods/
الموقع يعطيك عدد السعرات الموجودة في بعض الاكلات وكمان طلبات بعض المطاعم وكيف ممكن تحرق هادي السعرات 

الأربعاء، 23 يناير، 2013

اسباجيتي بولينيز




المقادير:
*٥٠٠ غرام مفروم لحم (يمكن استبداله بدجاج عن الرغبة)
* بخاخ زيت الزيتون (متوفر في السوبرماركت "الدانوب على سبيل المثال")
* ١ بصل مفروم
* ٢ جزر مقطع لمربعات صغيرة جدا
* ٣ فص ثوم مهروس
* ١ عود من الكرفس مقطع لقطع صغيرة جداً ( يمكن الاستغناء عنه عند الرغبة ولكنه مفيد جدا )
* ٤٠٠ غرام طماطم مهروسة
* ٢٠٠ غرام معجون طماطم غير مضاف له ملح
* ١ ملعقة شاي أوريجانو
* ٢ ملعقة بقدونس مقطع
* ملح (حسب الرغبة)
* فلفل أسود (حسب الرغبة)

* مكرونة قمح كامل
* جبنة بارميزان (اختياري)

طريقة التحضير:
١-  يستخدم بخاخ زيت الزيتون لمنع التصاق المكونات بالقدر ولاضافة بعض النكهة
٢- يضاف المفروم
٣-  يضاف البصل والجزر والكرفس والثوم ويترك على النار لبضع دقائق ويقلب من حين لآخر
٤- يضاف معجون الطماطم ويقلب جيدا
٥- يضاف الطماطم المهروس  ويقلب جيدا
٦- يضاف التوابل (اوريجانو، ملح ، فلفل أسود)
٧-  يوضع الخليط في طبق قابل لاستخدامه في الفرن ويترك في الفرن بحرارة ١٨٠ ْ لمدة ما بين ساعة لساعة ونصف ويقلب من حين لآخر
* اذا بدأ المزيج يبدو جاف اضف القليل من الماء واعده للفرن*
٨- قم سلق المكرونة حسب ارشادات الطهي عليها
٩- توضع الكرونة في صحن التقديم ويوضع الخليط فوقه ويختم بملقعة شاي من جبنة البارميزان

وبالهناء والعافية
تذكر ان تتوقف عن الاكل حين تبدأ تشعر بالشبع حتى لو لم تنهي الكمية الموجودة بصحنك